一向睇開減肥資訊嘅女士,相信一定唔會唔認識營養師 Cynthia。佢除咗會喺各大報章專欄分享正確嘅減肥資訊之外,仲不時喺 fb page 分享愛貓嘅日常,followers 逾十萬。
前陣子,Cynthia 其中一隻愛貓 Milo 因病離世,令佢心情跌落谷低。及至日前,Cynthia 收到朋友嘅一份神秘禮物,佢話「未見到真身,我已經喊咗出嚟」。
原來禮物係一隻羊毛氈版本嘅 Milo。不論毛色、面貌同眼神,都同真嘅 Milo 九成九相似,而 Cynthia 另一隻愛貓吉吉見到之後,都以為 Milo 返咗嚟,仲錫咗佢一啖添!
Cynthia 立即 capture 低呢個咁感人嘅畫面,並出 post 感謝友人嘅一番心意:「事實證明,吉吉貓係最掛住二哥嗰個。吉少爺一見到佢,就錫咗一啖。感謝我的好戰友秘密地為我預備的大禮物,這份禮物是無價的,真係太似,Milo 的靚仔版,未見到真身,我已經喊咗出嚟,I love you,my dearest Can Can,你真是天才。」
貼文一出,網民都大讚「堅似」、「幾可亂真」,「以為係真㗎」、「還以為係舊相 repost」,唔少網民睇到張相仲睇到眼濕濕,被受感動 (包括有追開 post 嘅小編在內)。
相信 Milo 喺彩虹橋見到都會知道主人有幾咁掛住佢㗎,小編亦希望 Cynthia 可以早日平復心情,盡快挨過最傷痛嘅日子。
感謝圖片授權:@HiWongCC