月前,英國諾定咸郡 (Nottinghamshire) 一名女狗主用大石綁喺狗狗 Bella 頸上,然後將佢扔落特倫特河 (River Trent),企圖想浸死自己嘅寵物,然後逃離現場。
路人 Jane Harper 當時沿住河邊散步時,突然聽到一聲巨響,就走去河岸一望,見到一隻狗正喺河中掙扎,並慢慢沉落水底。喺報警之前,Harper 立即趕去河岸營救呢隻 10 歲嘅比利時牧羊犬。警方到場後即刻將狗狗帶去附近獸醫診所搶救並做檢查。獸醫指出:「狗狗血糖嚴重偏低,體溫過低,佢全身發震,無法站立。幸好佢及時接受治療,如果唔係好可能已經救唔番。」
警方透過晶片識別出狗狗嘅女主人 Charlene Latham,然後隨即去到晶片登記住址將佢拘捕。Latham 被捕後承認賤酷對待動物控罪。日前,佢收到由地方法院頒佈嘅社區服務令 (為期 12 個月),且需罰款 80 英鎊,並被勒令支付 232 英鎊嘅行政費及受害者附加費。同時,佢亦被禁止養狗 3 年。
狗狗 Bella 現時被送到諾定咸嘅 RSPCA Radcliffe Animal Centre ,等待佢完全康復後,中心就會幫 Bella 尋覓新主人。「希望 Bella 有機會等到一個充滿愛心嘅家庭,可以同佢共度晚年。」
資料及相片來源:Independent