疫情下，外國有唔少電視製作工作室都需要暫時關閉，但好多電視節目主持都因為咁而決定喺屋企家中舒舒服服咁做直播。美國印第安納州 14 First Alert 首席氣象學家 Jeff Lyons 就喺佢屋企大廳整咗個綠幕，繼續喺屋企發佈天氣預報。雖然佢一般都係獨自上鏡嘅，但近日佢屋企嘅貓咪 Betty 都忍唔住要一齊上埋鏡主持節目。
10 歲嘅 Betty 月前首次喺銀幕亮相，當時佢只係對 Lyons 嘅器材感好奇而走去綠幕前探索一番。Lyons 一邊報告天氣，一邊抱住佢。Lyons 原本以觀眾會留言話佢唔專業，畀貓貓亂入，但相反觀眾嘅反影出奇地好，仲係咁讚 Betty 上鏡。徇眾要求下，Betty 現 Lyons 成為天氣預報入面嘅固定嘅貓主持人，佢甚至擁有自己嘅 title – “Betty the Weather Cat”。
然而，要令 Betty 乖乖聽話並唔係咁容易㗎！Lyons 表示：「Betty 畢竟係一隻貓，所以我經常需要用火腿嚟引誘佢，佢先會乖乖坐定 (一陣) ，或者要將零食放上錄影機上面，佢先會望鏡頭 (一陣)。我有時感覺我好似為觀眾表演緊人貓定力大測試，多過報告天氣。」
Lyons 最近開始整合 “Betty the Weather Cat” 網絡追蹤器嘅資料，嘗試了解除咗美國之外，究竟有無其他國家嘅觀眾有收睇佢嘅天氣報導。佢發現自從 Betty 開始和佢一齊做節目之後，佢嘅在線觀眾增長得出奇地多，一啲觀眾甚至係來自歐洲、澳洲、亞洲，以及東南亞。
Lyons 笑言：「好明顯世界各地嘅觀眾並唔係突然想關心美國嘅天氣，而係想睇 Betty！」為咗滿足全球貓奴嘅需要，Lyons 為 Betty 開咗個 ig 帳戶，名為 @bettytheweathercat，現時 Betty 有逾萬追蹤者，每日嘅留言過千個。Lyons 表示自己每日都要花數小時為 Betty 回覆留言，又要幫佢拍片影相放上社交平台, 感覺自己似 Betty 經理人多過一位天氣報告員。
相片來源： ig @bettytheweathercat
