日前，英國 Liverpool Bootle 地區嘅居民發現一隻全身白色嘅鹿喺市區四圍遊蕩，警察接報到場之後聯絡防止虐待動物協會 (RSPCA)。
RSPCA 提議警察由得隻鹿自己行，等佢自己搵路返入樹林 (“leave the deer as it would make its own way back home”)。
警方表示，佢哋亦試圖打咗好多次電話，希望聯絡到一個可以幫助安全轉移呢隻鹿嘅動物組織，但不果。RSPCA 覺得喺市區並唔適合用麻醉槍，因為怕白鹿受驚後喺市區拔足狂奔；喺擔心危害道路使用者嘅情況下，警察決定將呢隻白鹿「人道毁滅」（即射殺）。
網民對英國警方做法嘅評價好壞參半。部分人覺得白鹿唔算係太具殺傷力嘅動物，再者，佢只係迷路返唔到屋企，唔應該被無辜射殺；另一邊廂，部分人認同警方嘅做法，認為大家始終唔熟悉野生動物嘅習性，未知有咩會令白鹿受驚發狂，而佢亦好有可能會因為肚餓而隨時闖入民居索食，危害市民生命安全。
資料來源：BBC
