面上有斑有痣，唔少人都會想盡辦法美白，然而近日英國就出現咗一隻因為面上有一大撻黑斑而人氣爆紅嘅金毛尋回犬。
佢叫 Enzo，全身金黃色，唯獨左邊面頰有一大撻猶如被撥上墨水嘅黑斑，連皮毛都呈純黑色。不過反而正正因為 Enzo 有呢個缺憾美，令佢喺 IG 上人氣爆燈，短時間內 IG 坐擁 18 逾萬粉絲。
主人 Castro 回想當初同 Enzo 第一次見面嘅情況：「當初我哋見到 Enzo 就立刻畀佢面上嘅黑色標記所吸引，同時都因為佢性格活潑好動，我哋好鍾意，所以選擇咗佢。佢面上嘅黑色標記其實是基因突變所導致，但係完全唔影響到生活同健康嘅。」
唔好睇 Enzo 好似好乖巧，個樣好似好天真無邪咁呀，其實佢有一個小小嘅壞習慣㗎， Castro 爆料：「佢係一個偷襪賊嚟㗎！如果我出門口時唔記得關埋後門，佢會跑出去偷人哋晾曬緊嘅襪，然後收埋喺自己床舖入面。」
自從主人幫 Enzo 開咗 IG 帳戶之後，至今已經累積咗 18 萬粉絲喇！Castro 坦言：「一開始以為只有我哋屋企人同朋會追蹤，估唔到到最後竟然吸引咗咁多粉絲！依家我哋手機相簿入面幾乎全部都係 Enzo 嘅相，但係見到大家都咁鍾意 Enzo，又無因為佢面上嘅黑色標記而討厭佢，我哋都覺得好開心。」
資料來源：Insider ; ig @mister.enzoviola
