月前，土耳其嘅伊斯坦堡醫院接到一單突如其來嘅新症。一隻焦急嘅流浪母貓叼住佢自己嘅貓 B 去到醫院急診室，揾醫院工作人員拯救佢嘅貓 B。
醫護人員見狀，立即抱起貓 B 為佢診症，心急如焚嘅母貓喺醫院不停咁跟住醫護人員，視線無離開過貓 B。
醫護人員 Merve Ozcan：「同事為貓 B 診症嘅同時，我哋亦畀咗食物同牛奶貓媽媽充飢。為佢哋進行簡單嘅身體檢查之後，我哋就將佢哋送去獸醫診所再作詳細檢查，幸好小貓情況良好，只係有啲營養不良。」
Ozcan 將貓媽媽叼住貓 B 去到醫院急診室救診嘅相上載至 Twitter，估唔到相片會喺社交媒體上被瘋傳，牽動成千上萬人嘅心弦。相片獲得全球逾百萬個讚好、大量評論同 retweet。 唔少網民亦大讚當地醫護人員「好有愛」，雖然該該醫院係醫人嘅，但係對小動物都一樣關愛。
相片來源：Twitter @ozcanmerveee
