日前，SAA 保護遺棄動物協會職員帶會內狗狗散步時，發現附近垃圾站出現一個保溫袋，上面寫住「有狗請收養」，打開發現有 2 隻仍未開眼奄奄一息嘅狗 B。職員唔知道到底狗 B 畀人放置咗喺垃圾站幾耐、亦唔知道佢哋幾耐無食過野同飲過水。
幸好，職員抱起狗 B 嘅時候，佢哋仲識得郁同有反應。職員餵飼佢嘅期間，發現狗B佢哋身上好多蝨，已即時為佢哋清除。估計狗 B 出世幾日，仍未開眼，需要 24 小時照顧，暫時已經被安排到義工屋企暫時寄養。
將出世幾日未開眼嘅狗 B 放入密封保溫袋入面，並任其於中午時間曝曬，呢個無疑係虐待動物嘅行為，無論有當中有咩苦衷同困難要被逼棄養，都唔應該選擇呢個以動物生命作賭注嘅極端殘忍方法。假如職員遲咗去散步、遲咗發現，或者狗 B 呢一世都唔會有機會張開眼，睇到呢個世界。
現時狗 B 情況仍未穩定，希望大家可以為佢哋集氣，希望佢哋能夠渡過呢個難關。
除了以上 2 隻狗 B，SAA 仍有唔少被遺棄嘅動物需要你哋嘅幫忙㗎：
https://saa.org.hk/zh/donation.php?id=8
授權轉載：SAA 保護遺棄動物協會
