日前,日本 Amazon 網購平台有一款特大「三層貓籠」,售價 14,680 日圓 (約HK$1,000),主打空間寬敞,貓籠底仲有轆,方便移動。
一名買家網購咗呢款貓籠,事後仲留咗 4 星「好評」。不過,網民仔細睇,發現評價內容有啲奇怪。該名買家留言:「有一日呃老婆要加班,結果去咗同另一女人『密會』,結果畀老婆發現,嬲到將我鎖咗入呢個貓籠入面… 呢款貓籠真係好堅固,我出盡力都開唔到個貓籠,相信無論貓咪脾氣再點暴躁,佢都逃走唔到,真係物有所值!」。
該名買家仲語帶戲謔地咁講,「呢款產品對貓咪嚟講應該好舒適,足以畀一個成年男人喺裡面度過咗 20 個鐘,品質真係好好!但係我唔想再入返去喇,所以我只會畀 4 粒星…」。
後來呢則評論被其他網友截圖,隨即喺 Twitter 上被瘋傳,好多日本網友紛紛表示,「一個非常值得信賴嘅評價」、「雖然『密會』係衰,但係點解要被鎖入貓籠呢?」、「非法禁固罪喎」。
資料來源:UDN