巴西一隻流浪貓喺一場暴雨之中，闖入巴西律師公會大樓嘅接待處避雨。大樓裡面嘅員工非常有愛心，除咗幫貓咪抹身餵食之外，仲整咗個貓窩畀佢休息。雨停咗之後，可能貓咪見呢度好食好住，所以決定留喺大樓入面。
然而，有進入大樓嘅客人不滿並投訴接待處有貓，認爲咁嚴肅嘅公會唔應該有貓喺度。律師公會董事會為此開咗個緊急會議，並作出令人非常愕然嘅決定 – 「僱用」貓貓做正式員工，咁樣佢就可以明正言順留喺度。董事會為貓咪改名叫 Leon。Leon 成爲喺門口接待客人嘅正式僱員，仲擁有正式嘅員工証。
Leon 深受律師公會員工嘅喜愛，好多初時無法接受嘅客人都畀佢嘅親切同友善慢慢征服。於是，律師公會甚至為 Leon 開咗個人嘅 ig 帳戶。Leon 現時嘅粉絲人數已高達 11.5 萬喇！月前，佢更已成功「升職」成爲「貓律師」。董事會仲以 “Leon” 命名其中一個辦公室，亦以 Leon 嘅名義成立非牟利組織「Instituto Dr. Leon」，致力促進動物權益。所以話，毛孩嘅力量真係不容小覷呀！
相片來源：ig @dr_leon_advogato
