近排天氣涼咗，公司唔少同事都 plan 同朋友假日去行山同露宿。佢地都不約而同地收睇一個叫「BillyGoOut 比利出走活動組」 嘅 Youtube Channel 。 一向唔多去戶外活動嘅小編就好想知，呢個 channel 到底有咩咁吸引呢？好奇心作祟之下走去睇睇，點知一睇便愛上，仲睇到停唔到添！呢位山系型男 Billy 同愛犬 Hola 上山下海，帶大家喺香港尋幽探秘，連同狗狗荒島求生都試埋，喺呢期疫情下，對於個個宅在家無得去旅行嘅香港人黎講，Billy 拍嘅片的確係令大家有一份「睇咗當去咗」嘅心靈安慰嘅！
今日，我地 Smart Pet Pet 有幸邀請到 Billy 同佢嘅愛犬 Hola 去到橋咀島做個戶外訪問，全程 Billy 同 Hola 化身導遊，帶我地 Smart Pet Pet 攝製隊呢度去嗰度去，Billy 每個景點都同我地逐一介紹。無 Billy 介紹，小編都唔知香港原來有咁多咁靚，仲可以帶狗狗一齊去嘅戶外地方嫁，今次真係獲益良多呀！Billy 仲細心到喺沙灘 set 爐煮咖喱俾我地食添，你地恨唔到嫁喇！
Smart Pet Pet x Hola 主人 Billy 對談
SPP: Smart Pet Pet
B: Billy
SPP: 可以先同大家介紹一下 Hola 嗎？
B: 佢叫 Hola，係四歲嘅 poodle。我哋有個朋友嘅狗狗生咗一逗狗仔呀，佢又照顧唔到咁多狗 BB，所以我哋就帶咗 Hola 嚟我哋屋企。
SPP: Hola 平日最鍾意做啲咩嫁？有無啲特別嘅生活習慣？
B: 佢最鍾意就係去行街，周圍去八卦，尤其是去啲新地方佢就特別開心嘅。每一次我哋帶佢去露營同行山，佢就會好興奮㗎喇。喺戶外地方佢好鍾意喺草地或者沙地碌黎碌去嫁，一有泥地佢又會忍唔住喺啲泥度捲黎捲去，捲到污糟邋遢成隻泥鴨咁。另外如果見到其他小動物，佢就會更加 hyper。
SPP: 你經常帶埋 Hola上山下海同去露營，有無發生過啲咩有趣事可以同我地分享一下？
B: 有次我地行山，佢衝咗去前面跟住不停向住個草叢吠，我行過去睇啦，原來有隻超級大野豬喺個草叢度，唔知隻野豬係咪嫌佢煩，即刻走咗，怕鬼咗 Hola。
SPP: 帶狗狗上山下海同露營，有啲咩特別野要注意嫁呢？
B: 天氣曬嘅話要特別注意下，可能跟你行山狗狗就算熱到死，佢哋都會陪你繼續行落去，唔會識出聲嫁。好多時其實佢哋已經 overhit 咗你都唔會知，咁就好容易中暑喇。始終佢哋成身 fur，腳仔又貼住個地，當我哋覺得熱佢哋就更加覺得熱，所以呢方面要特別小心，要定時定候畀佢哋喺蔭涼處休息下，用涼水幫佢哋散下熱。
SPP: 你覺得帶埋狗狗去一齊做戶外活動，當中有咩樂趣？
B: 其實養狗已經係一個好大嘅樂趣嚟嫁喇，同狗狗相處可以畀到人類好多快樂嫁。每次同狗狗一齊去一個陌生嘅地方，感覺就好似同佢有個冒險嘅旅程咁，好開心嫁！
SPP: 知道你帶狗狗出遊嘅片好多人睇，初頭點解會有將同狗狗出遊嘅片拍成 Youtube 片呢個概念嫁呢？之前有無預計到會有咁多人睇嫁呢？
B: 剛開始拍片時其實都只係實驗性質咁拍，拍攝過程自己都覺得幾滿足。初初都唔係話太多人睇嫁咋，未正式擺喺 Youtube 嗰陣時，我只係擺喺 facebook share下嫁咋。初時無乜特別話好用心咁諗 content 嘅，純粹 share下同 Hola 嘅日常生活嗰啲野，直至一次諗到不如露營帶埋佢試下拍啲片咁，發現突然間反應好咗喎，咁我就繼續同 Hola 拍番啲同類型嘅出遊片喇。本身無預計過反應咁好嫁，純粹開心 share下，點知突然間多咗好多 fans，同埋好多人鍾意 Hola 啦，佢依家好多 fans 嫁！
一開始我哋本來都係以戶外活動為主，不過前排好唔好彩有疫情到啦，大家要匿喺屋企，嗰段時間我哋就變咗喺屋企天台一齊煮飯仔，好多 fans 都有繼續 keep 住睇。
SPP: 拍 Hola 你覺得有無啲咩難度嫁呢？拍攝當中又有無啲咩樂趣嫁呢？
B: 個難度就係佢無定向嘅，好多時佢畀到好多意外驚喜我嫁。一般我拍野唔會刻意要求 Hola 要做啲咩嘅，通常我擺定咗部機，我就做我自己野， Hola 就會周圍喺鏡頭前後「騰」黎「騰」去。好多時我都係返到屋企睇番啲片先發覺「𠵱！原來我專心煮緊野食，Hola 喺後面碌緊地沙喎」，好多時睇番片就有好多呢啲驚喜嫁！
SPP: 如果之後飛得番，你有無諗過帶埋 Hola 外遊呢？
B: 我曾經都有諗過嘅，不過我無做過好詳細嘅 research，我只係知道帶佢哋外遊要放佢哋喺個貨倉度，好似當佢哋貨物咁樣運送，當中都有聽過會出意外啦，點都有個風險喺度嘅，聽過又話會走狗，運送途中狗狗又過左身咁樣，呢啲風險我暫時唔係好想負擔。聽聞如果可以好似 Hola 呢個重量係可以 hand carry 上機嘅，咁如果真係可以嘅話，我帶佢去都無妨嘅。暫時發下夢先啦！呢期唔好話狗仔啦，我哋人仔都好想飛下呀！
SPP: 你覺得有 Hola 之後，有無令你嘅生活有所改變呢？
B: 養 Hola 之前其實我有另一隻狗狗嘅，係史納莎黎嘅，叫 Henry。開始養狗之後，個人生活一定係改變咗嫁。嗰時 Henry 過身之後，我先至發現自己嘅生活因為佢改變咗有幾多。慣咗有狗狗喺屋企，佢令屋企多咗好多生氣嫁。每日當你返到屋企，佢就會喺門口擺住尾等你返嚟、嗌你，或者要你同佢快啲去街去玩，令屋企熱鬧咗。當佢真係走咗嗰陣，一番到屋企即刻唔係好想返屋企呀，因為屋企即刻靜曬。及後 Hola 黎咗之後，佢又重新帶番呢一份快樂畀我哋。佢哋真係我嘅開心果嚟嫁，有時唔開心，返到屋企見佢哋擺擺尾，咩唔開心都唔記得嫁喇！所以狗狗真係人類最好嘅朋友嚟嫁！
