Serenity 係一隻 4 歲嘅雪橇犬 (Husky) ，佢曾經係美國德州 (Texas) 嘅流浪狗。Serenity 天生面上就有一個巨大嘅腫瘤，而腫瘤更不停擴散及惡化，令佢面上嘅頭骨都腐蝕埋。但佢仍然能夠如常呼吸同進食。
流浪狗救援隊將 Serenity 救咗返嚟，細心幫料理傷口之後，好希望幫佢揾到一個 forever home，但係大家都知道以 Serenity 嘅奇特容貌，等到有心人真係有啲難。照顧 Serenity 期間，救援隊隊員表示：「雖然 Serenity 咁不幸，身世亦咁可憐；獸醫話一般有腫瘤嘅狗每日都會痛，但係好奇怪，佢無表現出任何唔舒服嘅跡象，每日都笑面迎人，非常樂觀。我哋每一個同佢相處過嘅隊員都好鍾意佢！」
一年時間過去，救援隊突然收到一個叫 Patti Dawson 女士嘅電郵，佢決定做 Serenity 嘅養母。救援隊隊員全部喜極而泣，十分激動。收養咗 Serenity 之後，Dawson 第一件事安排同 Serenity 影相。Dawson 估都估唔到 Serenity 嘅相喺社交平台一出，隨即收到唔少有心人希望捐款同送贈物資畀Serenity，亦祝福 Serenity 生活愉快，好有愛！
不過，可悲嘅係，Serenity 嘅腫瘤開始擴散至眼骨位置，雖然唔知道 Serenity 仲剩低幾多時間，但係我哋深信 Serenity 喺餘下嘅光陰一定會過住幸福快樂嘅日子嘅！
資料及相片來源：Animal Lovers
