邊個咁睇得開，唔介意客人只係黎探狗狗又唔幫襯？佢係高級二手品牌時裝店 Byouthmelon 嘅店主 Betty。訪問當日，我地 Smart Pet Pet 抵達 Betty 位於火炭嘅樓上舖，小白慢慢走過黎好仔細咁聞我地，連袋入面張八達通都聞埋。Betty 直言：「佢比較慢熱，唔好摸佢住，要俾佢聞一段時間先，如果唔係佢可能會吠同噬你嫁！」好彩，我地 Smart Pet Pet 嘅攝製隊都甚得小白歡心，好快就同佢混熟喇，對我地不之幾咁友善 (利申 ：我地手上無野食嫁！)。Betty 都好驚訝：「佢似乎都幾 like 你地喎！可能佢知你地今日黎拍佢！」
Smart Pet Pet x 小白主人 Betty 對談
SPP: Smart Pet Pet
B: Betty
SPP: 同大家介紹一下小白先吖？妳同小白又係點樣相遇嘅呢？
B: 佢叫小白，五歲，男仔，係柴犬嚟嘅。佢其實係我以前男朋友成日唔得閒陪我買嚟送畀我嘅。大家養咗小白無幾耐就分咗手，咁我就繼續照顧佢喇。佢都成日話如果小白有咩事就可以話畀佢聽，但係我都費事煩人啦！
SPP: 點解妳會選擇帶小白返舖頭做野呢？
B: 其實我喺開舖之前係做服裝指導嘅，工作時間好長，同埋好多時要喺外地工作。一次要出埠，我就帶咗佢去狗酒店，第二日我就返上去大陸做嘢喇。無幾耐狗酒店職員打黎，話小白咬傷咗佢三個職員，仲拍條片畀我睇，我見到小白好似變咗「生化狗」咁，隻手係咁撐住個玻璃門，又唔畀人入去嗰個遊戲房嗰度，佢直情霸曬所有人嘅地方呀。我即刻叫朋友去幫我接走咗佢先，因為佢哋都有我屋企鎖匙。返到屋企之後，佢先至 calm 番。
我完成咗個 job 返到黎佢好似好嬲我，又唔係好信我咁。發生咗呢件事之後，我都好心痛，跟住就諗，係咪我以後都要成日出 trip，令到佢咁樣，令到佢又癲呢？之後我就決定唔再接出埠 job，陪佢多啲。開左黎呢間舖之後，我就日日帶佢同我一齊返工，唔希望之前嘅事再發生，唔想佢又再癲過。
圖：大家睇下小白嘅身影幾咁「搶fo」！(ig @Byouthmelon)
SPP: 小白平時喺舖頭有咩職責嫁？
B: 佢會陪我一齊影衫相，因為佢好多時都好鍾意搶鏡嘅，所以你見我 ig post 啲相好多都有佢。
SPP: 妳平時幫人揀衫襯衫咁叻，妳對小白嘅衣著又有無特別要求嫁呢？
B: 我比較著重狗狗衫嘅衣料，一定要揀純棉嘅。同埋我鍾意佢著啲咁簡單素色嘅衫，好怕花呢花碌，好 fancy 嗰啲。
SPP: 知道小白之前做左手術，究竟發生左咩事呢？
B: 之前佢唔小心食左個膠蓋，好嚴重，去到腹膜炎，腸穿咗兩個窿，成個肚都感染有菌，醫生要緊急同佢開肚。最後剪咗佢條腸 10 cm，因為佢嗰度已經壞死曬。好在佢過到危險期，可以出院。我嗰時要貼身照顧佢啦，同埋佢做完手術，之後唔知係咪佢已經變成一個「有經歷嘅男人」，開始勁嗲，個眼神都溫柔咗，之前係兇狠串樣嫁嘛，好似真係經歷過生死返嚟，生性咗，純品咗！
SPP: 妳介唔介意客人只係黎探小白又唔幫襯呢？
B: 我唔介意呀，我覺得開舖唔一定只係為咗生意嘅，好多有養狗嘅客都會上黎同我傾下狗狗野傾好耐嫁，好多知識都係啲客畀我嘅。同埋有啲客都好有心，知道小白做完手術都成日慰問佢。同埋嗰陣時佢病咗，其實個個都好擔心佢，咁我網上叫啲人「集氣」叫小白要爭氣，快啲好返，好多客都支持同嚮應，所以我都好多謝佢地。
SPP: 妳覺得養左小白之後，佢有無令妳嘅人生有咩改變呢？
B: 你知狗狗醫藥費不嬲都好貴嫁啦。經歷過手術事件之後，佢令我學識要即刻處理好自己啲財政。佢未有事件之前，其實我係成日勁爭卡數嘅，但係因為做手術事件，我就調動曬我啲錢去清咗啲卡數，然後再慢慢找佢呢條手術數。我覺得小白好似係黎幫我咁，我都要多謝佢，佢令我重新審視我自己嘅財政，同埋令我開始諗下係咪要買啲基金，儲定多啲錢，以備不時之需。
SPP: 如果小白係人類，妳覺得佢最適合做邊行？點解呢？
B: 我覺得佢適合做懲教，佢夠兇狠吖嘛！又成日跟住啲人，同睥住佢哋咁！
圖：Betty 用小白個萌樣黎做衫袋 label 貼添呀，超「打耳」呀！
