好多狗主都夢想可以帶狗狗一齊返工，包括小編在內。今日我地 Smart Pet Pet 嘅主角 Judith 絕對令我地一眾狗主既羨慕又妒忌呀！佢嘅主子 Zelda 除咗日日同佢一齊「返工」之外，仲同公司同事相處得非常之咁融洽添！訪問當日，我地 Smart Pet Pet 攝製團隊抵達 Judith office，Zelda 跟隨同事接待我地，仲笑口噬噬，不停擺尾歡迎我地添，今時今日咁嘅服務態度，絕對值得一讚呀！
Smart Pet Pet x Zelda 主人 Judith 對談
SPP: Smart Pet Pet
JD: Judith
SPP: 可以同我地講講 Zelda 之前嘅慘痛經歷嗎？
JD: Zelda 依家八個月喇，係唐狗，可能又 mix 咗少少 German Shepherd，女仔嚟嘅。佢之前係地盤狗嚟嘅，好細個嘅時候佢同佢哥哥應該係畀人襲擊啦，個頭受重傷，頭破血流咁，個頭直情係穿咗窿嫁。義工見到佢時，佢全身抽筋又郁唔到。去獸醫度，獸醫話佢可能會以後都癱瘓嫁。不過好好彩，過咗一個禮拜佢就奇蹟地活動番。不過，依家其實佢眼仔睇野都唔太好嫁，拋波俾佢，佢多數接唔到嫁。同埋，可能佢條尾仔斷過啦，你見佢依家條尾都有少少彎咗嫁。
SPP: 點解妳會選擇領養 Zelda 呢？
JD: 其實我嗰日係睇咗三隻狗嘅，第一日睇一隻狗，我冇乜點揀我其實已經話 ok 㗎喇。不過，原來嗰隻狗狗已經有人睇中咗，咁就我畀人哋先啦！跟住第二隻就係見 Zelda 個哥哥嘅，係一隻黑色嘅唐狗，但係見佢同個 foster 好夾，我就反而說服個 foster 領養番佢啦！第三隻就見到 Zelda 喇，佢主動同我玩捉依因，覺得佢好得意，所以我嗰日就即刻填 form 領養咗佢喇！
photo by_Man Chan Photography
SPP: Zelda 平日有無啲有趣嘅生活習慣嫁？
JD: 佢係特別鍾情黑色嘅男狗嫁，可能似佢哥哥啦！佢有個男朋友仔嫁，又係黑色嘅狗狗黎嘅，叫 ah woo。佢一見到 ah woo 就會好熱情，自己撲埋去同人玩嫁喇！另外，Zelda 係好怕有太陽嘅地方嫁，可能之前喺地盤太曬佢有少少陰影啦。我哋晏晝行嘅時候，佢一定要揾有蔭嘅地方行，有時無得遮蔭嘅地方我就要抱佢喇！同埋呢，佢有個花名叫殘雞妹嫁，雖然佢之前病過啦，但係依家佢同狗狗打交好叻嫁！
SPP: 妳個人對繁殖場有咩睇法呢？
JD: 其實我都去繁殖場一次嘅，因為我之前想買一隻史納莎，去咗一個 breeder 度。我去到嘅時候先知原來佢係繁殖場嚟嘅，嗰度真係好恐怖嫁，全部都係籠疊籠咁，嗰啲狗狗全部都係啲毛黃曬呀，又好污糟咁，見到都真係好得人驚，感覺好差好差…
SPP: 知道妳都有做開暫托嘅，點解妳會選擇做暫托呢？
JD: 之前我都有養開狗狗嘅，之後狗狗離世，感覺自己已經習慣有狗狗喺身邊嘅生活，所以決定做暫托。不過，做暫托有時好矛盾，同狗狗建立咗感情，跟住就有人領養佢地，一方面會為佢地開心，另一方面又好唔捨得佢地，所以每次遇到呢個情況都要學習調整一下自己先得，就當佢地學成畢業囉，咁諗自己會開心啲。
SPP: 妳覺得 Zelda 有無值得妳學習嘅地方呢？
JD: 佢一落街就同其他其他狗相處得好好嫁喇！雖然細個佢有過慘痛嘅經歷，但係從佢依家呢個開心樣，你唔會發現佢以前係咁慘嫁。同埋佢非常親切合群，又好自信，我都要好好向佢學習一下！跑馬地啲街坊都笑 Zelda 話佢好 social，多朋友仔不在話下，跑馬地每條街佢都有一個 boyfriend 嫁！
SP: Zelda 依家日日都會跟你返工，佢喺 office 有咩職責嫁？
JD: 佢一返到黎會同所有同事 say hello，同佢地玩下，跟住就會坐喺我房睇住我做野。出面一有同事起身沖咖啡呀影印呀，佢又會即係埋去望下佢咩事咁，好八卦嫁佢，十足十一個監工咁！同埋，佢有時又會出大堂接待下黎到嘅客人咁啦。除左攞住地拖同掃把嘅清潔姐姐佢會吠幾下之外，佢一般都唔吠人嘅，所以大部分客人都好 ok 佢嫁！不過都真係有客人驚狗，見到狗會慘叫嘅，我就會即刻抱番佢入房囉！
特別鳴謝：Paws United Charity (PUC)
機構簡介 – Paws United Charity 是在香港成立的全義工運作註冊非牟利機構。 為了提倡善待動物及保障動物的健康和福利，他們致力透過教育寵物主人應有的責任、啓發公眾尊重生命以人道對待動物和宣揚領養代替購買的訊息，目標達致人和動物和諧共融。
