有睇過電視節目《家多咗個Pet》嘅,都應該會記得入面有個好熱鬧嘅大家庭,暫托咗隻狗狗Cillian,唔經唔覺Cillian去到呢個屋企已經半年,喺接受我哋訪問後冇耐佢哋更真正成為一家人,變成一家大細再加4隻狗狗嘅happy family!要照顧3個小朋友同4隻狗狗要點平衡生活?媽媽阿Bee坦言:「其實我從來都冇平衡過我嘅生活,一直都失衡緊,但因為好鍾意狗仔,見到佢哋開心我就開心!」
Bee:我希望盡我能力做到最好令Cillian安心
原本已經有3隻領養狗狗雪雪、BiBi同BaBa,所以Bee就選擇咗做暫托家庭,透過LAP (Lifelong Animal Protection Charity) 接咗狗狗Cillian返屋企。但一開始都唔係咁順利,因為Cillian以前喺山邊有過不愉快經歷,佢對外界好有戒心。「最初當佢同其他狗狗相處時都抱有敵意,大家硬鬥硬。Cillian一開始好不安、好唔適應,但我希望盡我能力做到最好。」Cillian試過半夜喺度喊,Bee就直接坐喺佢旁邊陪佢傾偈、唱歌,同埋摸下佢,令佢安心。
Bee希望用行動同愛令Cillian知道原來人類都唔係咁可怕,對人類改觀,第時去到領養人屋企都易啲融入。經過多番努力,Cillian終於放下戒心。「3個星期左右佢嘅眼神好似變咗,唔再咁惡,佢又會主動埋嚟聞下我同小朋友,對事物充滿好奇。之後嗰幾個月好似連個樣都變咗,好似小朋友咁,傻豬豬咁,而家成日都會笑。」
正式領養Cillian 真正成為家中新成員!
前陣子,Bee一家決定趁Cillian一歲生日,喺佢嚟咗剛好半年嘅時間,送份最好嘅生日禮物俾佢,正式領養Cillian!承諾以後嘅每一日、每個生日都會陪住佢,真真正正成為家中新成員。
即刻睇下阿Bee點用行動令Cillian再信任返人,融入一家之中啦!