如果你有睇過看過 Pixar 動畫電影《Up》，可能會記得電影入面嘅小狗 Dug – 一隻可以透過頸圈「講人話」嘅狗狗。以前，可能大家都認為將狗狗諗法轉化成為人話呢啲虛構情節只會出現喺電影，現實生活係唔會發生嘅。但係，唔到你唔信，近日南韓初創團隊就發表可以透過 AI 人工智能翻譯狗狗嘅叫聲，並成功研製出一個叫 Petpuls 嘅狗狗「情緒解讀頸圈」。
南韓初創公司 Petpuls 喺 2021 年美國消費電子展（CES）展示這咗呢款極具獨創性嘅狗狗頸圈。研發人員解釋：「頸圈除咗可以追蹤到狗狗嘅身體狀況之外，仲可以偵測到佢哋 5 種情緒，只要透過語音辨識技術監控狗吠聲就可以做到。經過對狗吠聲作分析之後，Petpuls 會透過app 通知奴才當下狗狗到底係開心、輕鬆、焦慮、憤怒定係悲傷。」
2017 年，Petpuls Lab 開始建立包含來自 50 個品種狗狗共 10,000 種狗吠聲嘅資料庫。3 年後，研發人員嘗試開發出可以分析狗狗情緒嘅專屬演算法。根據首爾大學測試裝置嘅數據顯示，呢條頸圈情緒辨識嘅平均準確率達 90% 之高。
喺 2020 年 10 月，Petpuls Lab 嘗試透過網店銷售頸圈，提供 5 種鮮豔亮麗嘅顏色供奴才選擇，售價 HK$768。小編認為價錢唔算貴，如果想平日更加了解主子嘅感受，並增進下情感聯繫，不妨可以買隻試下喎！
不過，小編自己嘅主子由細到大都唔多吠嘅，咁即係呢一世都無一個可以真正了解佢內心深處嘅機會啦！唉！只可嘆「這些機會不是屬於我的」 (灰)…
資料及相片來源：Petpuls
