講起導盲犬，相信好多人都會諗起日本電影《導盲犬小 Q》，電影將導盲犬嘅真實生活帶到觀眾面前，忠實記錄一隻導盲犬從出生、訓練、服務到死亡嘅全過程，感人肺腑，一時引起轟動。導盲犬係「視障人士第二雙眼」，除咗協助視障人士出行之外，仲係佢哋嘅生活同心靈伙伴。經多年大力宣傳同教育之下，導盲犬喺香港日漸普及。
小編一收到香港首間「導盲犬訓練學校」即將誕生呢個喜訊，立即想話畀大家知！昨日 (16日) ，香港導盲犬服務中心為香港導盲犬訓練學校進行咗簡單而隆重嘅動土儀式；儀式期間，大會更委任藝人黎諾懿先生為中心嘅「關愛大使」。
訓練學校選址打鼓嶺蓮麻坑路，將由空置多年嘅前三和公立學校改建而成，屆時校內除咗一般犬隻訓練設施之外，仲會設有導盲犬紀念花園，猶如「犬隻版」嘅浩園；導盲犬退休離世之後，佢哋嘅骨灰會安放校內，以示敬意，畀服務人類多年嘅佢哋，離世之後可以有個安樂嘅長休之地。
資料及相片來源：香港導盲犬服務中心 (HKSEDS)
