如果近日大家有睇 Netflix 大熱人氣韓劇《#魷魚遊戲》並且一晚已經煲曬 9 集嘅話,咁跟住落嚟介紹畀大家嘅 pet-friendly 餐廳就啱曬你「河車」喇!呢間餐廳位於觀塘工廈上面,小編入到去見到全場都係 Pastel 粉彩色,即時聯想到《魷魚遊戲》為劇入面其中嘅一個粉彩色主場景。唔好話小編唔教精你,趁套劇依家咁 hot,好嗱嗱聲去打個卡,兼喺 post 落番個韓文 tag #오징어게임,真係呃唔到 like 都難呀!
去餐廳除咗打卡,食物質素當然然都好重要啦!小編試過佢哋嘅招牌原隻燒雞,新鮮燒好嘅雞又香又滑又 juicy,非常值得推介!除咗燒雞,招牌菜仲有大大隻「蝦霸」同「蟹霸」熱狗,熱狗 size 有手臂咁長,絕不欺場㗎!聽店主講,遲下仲有機會出埋 pets menu 添㗎,狗狗們要耐心等下喇!
餐廳地方好寬敞,主人食嘢時,狗狗們可以自由走動同朋友仔聯誼下。小編去到當日,場內有成 7,8 隻金毛尋回犬,但空間夠曬佢哋玩同跑;餐廳冷氣超強,同狗狗喺海濱行到身水身汗嚟呢度歎番杯 Iced coffee、涼下泠氣,真係一樂也!
Jikka
地址:觀塘成業街 19-21 號成業工業大廈 3 樓 309 號舖