新年好多人都會喺屋企擺年花應節,不過有啲常見年花原來對毛孩有害,加上毛孩又係好奇寶寶,一旦誤食後果可以好嚴重。
1️⃣水仙
年花界首選,有催旺財運嘅作用。不過水仙花苞毒性好強,特別刺激毛孩嘅口同喉嚨,毛孩誤食後會出現嘔吐、腹瀉、流口水的徵狀,誤食份量多嘅話仲會引起抽搐、低血壓、顫抖以及心律不正。
2️⃣菊花
年花常客之一,其中嘅物質對貓狗都有害,誤食會出現嘔吐、腹瀉、流口水、皮膚發炎等徵狀。 而種植菊花時常用嘅殺蟲劑氯菊酯 (Permethrin) 對貓貓都係相當危險,氯菊酯中毒係貓中毒常見個案之一。
3️⃣百合花
有百年好合嘅意思,但百合嘅葉同花瓣對貓貓嚟講可以話係劇毒,唔單止誤食,就算只係身體接觸到,都會有危險,中毒後嘅貓貓會喺短時間內出現尿頻,造成脫水同埋急性腎衰竭。
4️⃣繡球花
含有天然毒素氰甙,誤食會有機會氰化物中毒,令胃腸功能紊亂,出現嘔吐、腹瀉,甚至抑鬱。
5️⃣富貴竹
家居常見植物之一,對貓狗一樣有害,誤食的話會出現流口水、抑鬱、厭食、異常興奮、嘔吐有血、瞳孔擴張等徵狀。
如果懷疑毛孩誤食中毒,主人應該盡快帶去睇醫生,千祈唔好誤信偏方呀。不過最重要嘅都係主人小心處理有毒年花,盡量避免毛孩接觸到就最安全!