大家見 100 毛詩勁同崔建芒同框就見得多喇，佢同佢嘅主子阿 Dee 嘅訪問係咪未睇過呢？今次，我地 Smart Pet Pet 有幸請到詩勁同阿 Dee 上黎同我地分享佢地嘅生活點滴同趣事，全情阿 Dee 都黐實詩勁，連詩勁行入廁所佢都要坐定定喺門口等佢，真係乖到呢…訪問期間，阿 Dee 全情坐喺櫈仔上面，耐唔耐又識得望下鏡頭咁，全程都好合作，我地工作人員真係慳番唔少氹狗嘅功夫呀！我地喺度真係要俾番個 “like” 阿 Dee 呀！
Smart Pet Pet x 阿Dee 主人詩勁對談
SPP: Smart Pet Pet
C: 詩勁
SPP: 可以同大家先介紹一下阿 Dee 嗎？你同阿 Dee 又係點樣相遇嫁呢？
C: 佢叫阿 Dee，今年 7 歲，係女仔嚟嘅，係 mix 左蝴蝶犬嘅芝娃娃。佢其實本身係我親戚養嘅，我表姨養嘅。佢屋企有一隻大嘅金毛同埋一隻 poodle。隻 poodle 成日都恰佢，所以佢好慘嫁，唔可以上床同我表姨瞓啦；如果嗰隻 poodle 喺張梳化度，佢又會吠返阿 Dee 落去啦，佢成日俾人恰，咁啱我表姨佢地搬屋，我暫養佢，養養下就養到依家喇！
SPP: 阿 Dee 有咩特別嘅生活習慣呢？
C: 如果你講嘢太大聲嘅話，例如喺屋企講電話講得大聲，佢係會好緊張咁衝上黎，然後會走嚟錫你同舐你，好似係叫你唔好咁大聲咁，佢係唔吠嫁！同埋我媽係負責餵零食嗰個黎嘅，每晚一兩點我媽就會餵咗佢之後先瞓，唔餵佢呢，佢會一掌拍落去叫醒佢嫁！同佢行草地呢，佢要揀地下個質地黎行嫁，佢唔會行視障人士嗰啲「粒粒」地啦，有石屎地同草地俾佢行，佢又一定係揀草地唔會行石屎地嫁！同埋，佢唔鍾意速度快嘅嘢嫁，跑得快過佢嗰啲狗，佢就會吠咗先，同佢差唔多嗰啲呢，佢就冇問題會同佢地一齊玩嘅。佢性格其實有啲高竇、有啲自大嫁，以為自己大小姐咁嫁！
SPP: 你有無同阿 Dee 之間發生過一啲難忘嘅事可以同大家分享一下？
C: 有一次可以話係最驚險嘅事啦，我帶左佢去行大澳一個好細嘅山，走嘅時候經過一條小路，中間有條大坑渠，突然間唔知咩事佢首先轉移咗你視線嚮嗰度 wee wee，咁我地就好忙咁樣幫佢沖水啦，佢突然間跳咗上個駁度然後跣咗落去喎，嗰個駁好高嫁，最後有個六呎高嘅哥哥落去幫我哋抱返佢上黎，我地先知個駁仲高過嗰個哥哥少少。佢平時唔會咁嫁，所以我地先好放心放繩，但嗰次真係唔知咩事，我哋有啲懷疑係因為農曆七月，驚驚哋！不過好彩最後佢乜事都無，因為下面有啲草墊住，無跌親！
SPP: 你覺得養左阿 Dee 之後令你有咩改變呢？
C: 我以前好唔鍾意芝娃娃嫁，覺得佢地好嘈呀，跟住隻眼又凸，又唔得意呀，跟住又太細隻啦！養左阿 Dee 之後，佢令我對芝娃娃呢個品種完全改觀。我覺得第時萬一阿 Dee 唔喺度，我都應該會養多隻芝娃娃嫁！
SPP: 如果阿 Dee 變左一個女人，你估崔建芒會揀阿 Dee 定你做女朋友呢？
C: 即係阿 Dee 變左我情敵嫁喇喎！我覺得佢都係會揀我囉！如果佢係人，佢勁煩囉，呢樣又唔食，嗰樣又唔食，零食佢都揀嫁，好難氹嫁喎！勁港女囉！
SPP: 如果阿 Dee 係人類，你覺得佢適合做邊行？點解呢？
C: 我覺得好似訓導主任呀，佢個樣夠嚴肅呀，佢一唔笑，個樣成日勁惡勁嬲咁嫁！屋企一有人嘈同太大聲，佢就會走過去話佢，阻止佢嫁！不過佢又唔吠嘅，所以可以話係一個淨係靠個樣就嚇到人嘅訓導主任囉！
SPP: 如果有一日你同阿 Dee 身份互調左，你最想做乜呢？你會想繼續做阿 Dee 定做番自己呢？
C: 好似幾好喎！涼又唔洗自己沖，嘢又餵埋畀我食，日日可以喺屋企攤喺度！哎呀！不過冇得自己行出街，好慘喎！諗諗下我都唔係好想做佢喇！
SPP: 如果結婚當日你同阿 Dee 身份互調左，你會唔會俾個婚禮如期舉行呢？
C: 梗係唔得啦！平時同男朋友帶埋佢出去，我都已經覺得佢好似電燈膽囉！因為一有咗佢喺度呢，我哋兩個 focus 就會喺佢度。我地就會不停留意住佢，完全唔記得我哋喺度拍緊拖囉！佢根本就係第三者！電燈膽！有佢喺度，我地都會抱住佢影相，從來都唔會再有淨係同男朋友嘅合照囉！
SPP: 如果生命只剩低一日，你會想同阿 Dee 做啲乜？
C: 我想同佢去旅行，去日本呀！因為我好羨慕人地日本好多嗰啲公園係俾狗狗入去玩嫁！香港就好少呢啲地方，嚟嚟去去都係得彭福同埋西九！
SPP: 如果有一日流落荒島，你被救，但只可以帶多樣野走，你會帶阿 Dee 定阿芒走？
C: 一定係阿 Dee 啦！人佢識照顧自己吖嘛！不過我一定會叫人去救番佢嫁放心！唔係唔救，只係要佢等多陣先救啫！阿 Dee 唔識保護自己吖嘛，一陣畀其他動物擔左佢點算呀！
SPP: 如果有一日公司同事變曬狗，佢地會係一隻咩狗呢？
C: 東方昇咁嘈，一定係嗰啲老虎狗啦！阿芒咁肥，佢應該係一隻中型犬！腦細高高瘦瘦、手長腳長咁，勁似英國人好鍾意養嗰啲獵犬呀！龍志權佢個樣直情係似日本柴犬啦，隻眼勁細，跟住唔出聲以為佢好斯文，一出聲就嚇死人！利君牙有期個髮型勁似 poodle 囉！盤菜瑩子細細粒又嬌滴滴，行路啲頭髮飄飄呀咁，佢一定係嗰啲長毛芝娃娃啦！
特別鳴謝：場地提供 @blackroomhk
