訪問當日下著滂沱大雨，拖著狗袋的蝦頭滿身濕透，坐在狗袋內的忌廉仔靜待主人打開拉鍊，非常乖巧。當蝦頭打開拉鍊之後，忌廉仔依然坐在袋內不肯出來，初時我們工作人員以為忌廉仔怕生保，不過，蝦頭相當了解忌廉仔：「你估忌廉仔真係怕生保咩，佢只係保護緊自己袋零食咋，驚人搶左佢呀！」當蝦頭把零食從狗袋內取出來，忌廉仔目不轉睛望住包零食跟住蝦頭行。蝦頭唏噓笑言：「佢有零食就乜都得，相信佢好易跟佬走…」
Smart Pet Pet x 蝦頭對談
SPP: Smart Pet Pet
HT: 蝦頭
SPP: 妳同忌廉仔係如何相遇嫁？
HT: 我初時見到忌廉仔完全唔係呢個 look 嫁！佢本身係一隻車房狗黎嘅，啲毛好污糟，好似鐵銹色咁嫁。同埋我覺得點解車房會揾隻咁細嘅狗看門口而唔係唐狗呢？佢咁細隻又嚇唔到人，所以諗極都諗唔明。平時佢見到啲著黑色 tee 牛仔褲嘅男人會吠得好厲害嫁，唯獨我一個男性朋友經過，佢就唔吠嘅，可能忌廉仔見到型男想同佢親近啦！忌廉仔見到我朋友，成日望住我個 friend 會嗚嗚叫好似好想同佢講野咁。
有一日車房突然間結業，個店主好似想遺棄佢咁，俾我個 friend 知道，驚佢流落街頭，所以佢即刻接左佢返屋企，可惜佢屋企唔養得狗，輾轉之下忌廉仔就去咗我屋企，因為我住村屋，朋友就俾左我叫我養住先，養養下就養到依家喇！佢由一隻困苦嘅車房狗，依家食好住好，搖身一變好似變左富貴闊太咁呀！
SPP: 可以同我地分享一件忌廉仔嘅搞笑事嗎？
HT: 忌廉仔知道我好錫啲貓，我感覺佢好似覺得如果模仿貓佢都會得到愛錫，唔知係咪因為咁，佢成日都會學貓貓自己舐手腳清潔，用手仔抹面；又學貓貓用貓板磨爪；見貓貓發出「喵」叫聲就可以有零食，佢開始唔 “wow wow” 叫而扮貓叫，好搞笑。
SPP: 可以同我地分享一件忌廉仔最過最令你印象深刻嘅事嗎？
HT: 我記得都幾深刻嘅就係，有次失戀定係感情有啲唔開心啦，我自己一個人坐左喺張床隔離嘅地下度，佢走埋黎我身邊望住我，佢靜靜地咁坐左喺我旁邊，時不時又望下我咁，好似想同我講「我喺度呀！我喺度陪你！」。我覺得佢好有人性呀！有時我都會同佢傾計，講到一啲傷感少少嘅話題，佢就會突然間眼淚盈眶咁，眼仔濕濕地咁，好似佢都識感受哀傷憂愁咁。
SPP: 養左忌廉仔之後，你覺得從佢身上學習到啲乜野呢？
HT: 我發現其實養寵物對於我嘅成長有好大幫助。養左動物之後，因為我真係要去同佢哋去溝通，要理解佢地嘅需要，呢樣野係需要你嘅心思或者你需要時間同佢哋建立一個關係，就因為呢一樣野，我覺得我開始更加懂得同其他人相處。以前做野會覺得，做完野咪走囉，無去用心經營或者無去細緻咁留意同其他人之間嘅連繫。
有寵物之後，發現只要你真係用心去感應嘅話，其實你係會知道對方大概諗緊乜嘅，既然同動物都 connect 得到，更何況我地可以用言語溝通到嘅人呢？所以我學識左花多少少時間了解多啲別人嘅需要，唔好淨係顧住自己。當你了解多左人地嘅需要，出黎同人溝通或者相處自然就會好好多。
SPP: 如果上天可以俾忌廉仔有一種能力，你希望係啲咩能力？
HT: 我想佢擁有一個識自己去廁所然後去完廁所沖厠嘅能力！因為其實佢一食嘢就食得好多嫁喇，所以去廁所都好頻密嫁，啲便便散開一粒粒咁，好似栗子咁嫁！去尿尿佢平時喺尿墊去得好地地嫁，但突然間又會有一兩次去到出曬界，所以如果佢識得自己 pee pee poo poo 仲自己識得沖埋呢，咁就 very good 喇！
SPP: 如果忌廉仔可以變成一個人，你想佢變成邊個？
HT: 我想佢變做 Eason 唱歌俾我聽，可以唱 K 歌之王俾我聽！
SPP: 如果忌廉仔係人類，你覺得佢適合做邊行呢？
HT: 我覺得佢會係一個戲子，佢成日為左食，會突然扮曬可愛情深款款咁；做左衰野，個樣又會懶係無辜咁望住你，佢可以成日變臉嫁！
特別鳴謝：場地提供 Feel Free Style
