平日毛孩不分日夜分擔我哋主人嘅苦惱,嚟到聖誕呢個普天同慶嘅佳節,身為主人嘅我哋,係時候要報答番佢哋喇!
講到送禮物,一年先一次,唔好咁孤寒啦,要買就買豪啲,等毛孩疫情下就算少咗去街街都知主人係錫佢嘅,等佢開心下啦!有見及此,小編精心篩選咗 9 件豪華嘅毛孩禮物畀大家,而且全部都可以網購㗎,足不出戶就可以買到禮物畀毛孩嘞,你哋班狗奴才識做啦!仲唔快啲拎定張 credit card 出嚟?
Vitajuwel Crown Juwel寵物健康寶石碗 (Lane Crawford ; HK$680)
將普通食用水倒入寵物寶石碗,碗中央嘅水晶球就會將寵物平日嘅食水改成「激活食水」。水晶球重新排列水分子,提高食用水嘅 pH 值同含氧量,有助增加毛孩嘅飲水量,令毛孩越飲越健康,越飲越有活力。
AESOP 寵物洗劑 (AESOP ; HK$260)
主要天然成分包括檸檬皮、茶樹葉同薄荷葉,氣味清新芳香,毛孩一定唔會抗拒;而且洗劑性質溫和,能夠好輕柔咁帶出潔淨效果,有效消除寵物異味,仲可以舒緩毛孩敏感嘅皮膚添。
Barbour 防水羊毛襯厘狗狗外套 (Selfridges ; HK$495)
外套使用品牌代表性嘅油布面料而製成,出名保暖,而品牌嘅 signature 格紋都出現喺背帶同外套嘅襯厘入面。外套防水耐磨,有燈芯絨領口,仲有魔術貼固定,同人著嘅外套完全無分別㗎,主人同寵物仲可以襯埋「親子裝」添呀,夠曬 warm 啦!
Baxter 狗狗頸圈 (Louis Vuitton ; HK$2,850)
LV 夠曬奢華喇啩!自問性格比較 loud 嘅「土豪級」主人,狗狗又點可以無一兩件奢侈品旁下身㗎!主人散步時想順便 show off 一下嘅話,有咗呢條 LV 嘅招牌 monogram 圖案狗狗頸圈,包你隔住條馬路都引到人望你同你隻狗呀!
Versace Medusa print 狗狗 T-shirt (Browns ; HK$1,600)
識幫狗狗揀件 Versace (嘩沙池) 著,一定係有 taste 之人啦!你見出名「有 taste」嘅阿叻都係品牌嘅頭號粉絲嚟,你就知啦!(笑) 呢件 Versace 羅紋針織 T-shirt 上面有大大個品牌標誌性嘅金色 logo 喺度,非常適合嗰啲想喺公園中鶴立雞群嘅主人同狗狗㗎!
Dog Perignonn 香檳毛絨玩具 (Bloomingdales ; HK$133.3)
聖誕節我哋人類開香檳慶祝,狗狗無得飲,不如畀狗狗「玩」香檳啦!呢支香檳玩具係用優質嘅毛絨製成,唔會為毛孩帶嚟敏感問題之餘,又耐咬唔易甩毛,淘寶貨絕對無得比㗎!
Marine Serre 黑色月亮真皮狗帶 (Ssense ; HK$4,147)
法國獨立設計師品牌 Marine Serre 嘅 signature 圖䅁係月亮,狗帶當然唔少得月亮嘅元素啦,望落別緻夠 high end 唔在講啦,條帶仲靭力十足㗎,鬼咩真皮喎,閒閒地用十年八年啦,四千零蚊,性價比夠高嘞啩!
Felix&Co. 寵物有機 CBD 油 (Felix & Company ; HK$650)
主人當然最希望毛孩嘅身體健健康康啦!研究指出 CBD 對人體及寵物同樣有好處。如果狗狗平日有焦慮、抑鬱、癲癇、疼痛及壓力等問題,CBD 油對佢絕對有幫助。Felix&Co. CBD 油嘅配方係專門設計畀寵物使用嘅,可以增進及調節寵物免疫系统;消除痛楚,減輕壓力;舒緩焦慮及抑鬱問題;舒緩癲癇問題。想毛孩 keep 住身心健康,梗要有支 CBD 油看門口嘅!
WanWan 雞肉芝士脆片狗小食 (HKTVMALL ; HK$100)
聖誕節我哋人類開「趴地」狂食零食,狗狗又點可以無得食?日本超人氣寵物零食品牌 Wan Wan 推出一系列狗狗零食,當中佢嘅芝士脆雞片,酥脆的雞肉片,配上香噴噴的芝士,小編狗狗食過之後番尋味,食唔停口,當然要推介畀愛錫毛孩嘅你啦!