如果你同小編一樣係 80 後，你一定對豬小姐 (Miss Piggy) 唔會陌生啦！Miss Piggy 唔單止係一個布偶咁簡單，佢更加係一個 Fashion icon 嚟㗎！日前，佢喺 IG 發佈咗佢嘅新動向- 就係同英國品牌 Ciaté London 合作，推出彩妝系列。
最新嘅彩妝完全合符 Miss Piggy 嘅貴氣形象，系列以粉紅色為主。小編認為全個系列最可愛嘅係嚿印咗豬鼻圖案嘅美妝蛋，相當趣緻呀 (小編開咗會唔捨得用㗎喎)！呢個系列其實唔單止係彩妝品咁簡單，背後仲有深層意義 – Miss Piggy 希望女性喺光彩背後應該為自己賦予權力；妝容只係表面，無論化咩妝都好，都係自己嘅選擇，唔需要介意人哋嘅眼光。
資料及相片來源：Ciaté London
