韓國流浪狗收容所 @neowahamgaenyang 喺社交媒體上宣布:「好開心!一隻需要我哋長期照顧嘅狗狗終於揾到佢嘅 forever home 喇!」
根據收容所負責人所講,呢隻小狗 Harang 喺被拯救之前有多年被虐嘅經歷,且被關籠足足 2 年。被救後,由於佢嘅健康狀況較差,需要中心嘅特別照顧及護理。因此,呢隻小狗等咗好耐都無合適嘅家庭收養。及至日前,呢隻小狗終於等到喇!收養人仲要係韓國人氣女團 Mamamoo 成員 Moon Byul (ig @mo_onbyul)!
Moon Byul 一向係愛狗之人,本身已經擁有 3 隻哥基 (分別名為 Daebak、Haengwoon 及Kunkang) 嘅佢,希望屋企多咗新成員之後可以更加熱鬧,亦希望狗狗 Harang 可以重新感受被寵愛嘅快樂同人間溫暖。
唔少韓國網民聽到 Moon Byul 領養嘅消息之後,紛紛點讚,更為佢同狗狗感到高興。更有網民表示:「我一直都好鍾意 Mamamoo 嘅 Moon Byul,依家令我有多個理由更加鍾意佢喇!」
資料來源:ig @neowahamgaenyang