相信唔少鏡粉及「小虎隊」都無錯過到日前 ViuTV 節目《幫緊你應援團》第 10 集啦!身為鏡粉嘅小編睇見阿妹岑樂怡 Tiger 身體力行,出心出力為流浪動物組織「大樹下」義賣 ,仲史無前例咁喺 2 小時內「清枱」籌得 HK$42,220 善款,真係感動到眼濕濕。
義賣過後,大樹下嘅義工 JoJo 仲感觸落淚:「做義賣從來未試過賣曬所有嘢咁好反應。試過義賣一日只係得幾百蚊,但係就算得幾百蚊都係要做,幫到幾多就幾多。」
節目中,義工燕姐亦有提及聽過最離譜棄養狗狗嘅原因:「話隻狗陀衰家,入咗屋都未行過好運」。而近年,唔少人移民都會想將狗狗拎去「大樹下」,但係 JoJo 就逢勸大家:「帶唔到狗狗移民嘅人最好問返自己相熟嘅朋友去接收狗狗,因為家犬絕對唔適合喺狗場生活,佢哋嚟到唔會習慣到呢度嘅環境,嚟到只會害咗佢。」
節目尾段,見到裝修師傅為原先烏燈黑火、落雨會水浸嘅糧倉加裝番門同燈,亦為原本又熱又焗嘅狗場加裝番吊扇,令狗狗可以清涼舒服咁渡過炎夏,真係好滾動!睇完個節目之後,小編覺得好鼓舞,而從燕姐同 JoJo 等狗義工身上亦學習到「好多事唔係睇到希望先至去堅持,而係堅持先至會見到希望!」大家共勉之。
相片來源:大樹下