網紅 KOL 始祖譚杏藍 (小花)一向俾人嘅印象非常 outgoing,性格爽直,大開大埋,朋友多的是,經常需要外出參與各樣活動同出席派對。小編喺度諗,小花成日都要外出應酬,邊有時間照顧貓貓呢?
今次 Smart Pet Pet 有幸揾到小花同我哋做咗個專訪,分享一下佢與愛貓 Biiru 相遇同平日相處嘅小故事。言談間,唔難發現小花面對住愛貓 Biiru,立即會由平日嘅豪氣 party queen 變身成為愛心爆棚同體貼入微嘅「廿四孝阿媽」,潛藏嘅母性簡直係迅間大爆發。
貴為天后級「派對動物」嘅小花,為咗愛貓甘願減少外出,愛上「宅在家」悉心照顧愛貓。呢種不問回報嘅犧牲同付出,就好似媽媽對兒女無條件嘅愛一樣咁偉大! 從以下專訪內容,唔知大家又會唔會感受到小花其實都有唔少「好媽媽」嘅特質呢?
彰顯「俠女精神」從繁殖場煉獄中拯救 Biiru
由細到大,小花都非常鍾意貓,只係屋企人唔俾所以一直都無機會養。直至有一日,小花有朋友喺繁殖場買咗一隻貓貓返嚟,無幾耐朋友老婆有咗 BB,就將貓貓帶番去繁殖場。朋友知道小花一直都好想養貓,就講佢知有隻貓貓喺繁殖場等待被領養。
小花聽到之後二話不說就去咗繁殖場探個究竟。得知貓貓唔夠奶水照顧唔到貓 BB,繁殖場負責人就同小花講:「如果你唔要佢,我哋就會揼咗佢。」受惻隱之心驅使下,小花不加思索就將貓貓帶咗番屋企喇。小花媽媽返到屋企見到貓貓大嚇一跳,小花此時向媽媽許下承諾:「養咗貓貓之後,我應承妳我會少啲出夜街同少啲約朋友出去飲野嫁!」小花笑言自己帶貓貓返屋企的確係有啲「霸王硬上弓」嘅,但媽媽到最後見小花的確有遵守承諾,就俾佢繼續將 Biiru 養到依家 6 歲大喇!
懂性嘅 Biiru 默默陪伴 助小花療癒喪貓之痛
幾個月前,小花另一隻愛貓 Soju 因癌症而病逝,令佢傷心欲絕。喺小花最悲痛嘅日子入面,平時表現較 cool 嘅 Biiru 默默咁陪伴住小花。「平時 Biiru 唔多鍾意人哋抱同摸佢嘅,但喺 Soju 走咗之後,可能知我唔開心啦,佢就主動走上我床同瞓喺我手臂上面陪住我,非常懂性。除此之外,我發現 Soju 走咗之後,Biiru 食慾都減少咗好多,而佢幾乎每晚都會定睛咁望住 Soju 以前瞓覺嘅地方,令我都有少少驚驚哋,因為我好相信貓係睇到『嗰啲野』嘅!不過從呢兩樣嘢當中,我睇得出 Biiru 知道 Soju 走咗都好唔開心嘅…」
「束縛不來」嘅人馬座突然變得癡家
小花直言自己擁有 typical 嘅人馬座性格,玩世不恭、鍾意周圍去、貪玩、凡事愛三分鐘熱度,但自從養貓之後,佢性格 180 度改變咗。「接 Biiru 番黎嘅一刻,我自己都諗,呢隻貓從今以後成條命都交託咗俾我嫁嘞喎,我開初都有質疑自己到底搞唔搞得掂。從來無養過貓,唯有一切從零開始,唔知唔識嘅嘢我會主動自己睇書、揾資料同問朋友。慢慢我發現自己變得有耐性咗、變得有責任心咗,自己都覺得自己突然多咗一份母性。呢啲都係多得 Biiru 教識我嘅。」
霸氣小花講你知 「唔鍾意貓嘅男仔我係一定唔會鍾意佢嫁!」
問及愛貓嘅小花,如果另一半唔鍾意貓佢會點?直腸直肚嘅小花不諱言:「邊有人會唔鍾意貓嫁?好老實,如果佢本身係唔鍾意貓嘅,我已經一定唔會鍾意佢囉!」
講開另一半呢個話題,小花突然爆咗樣惡搞嘢俾我哋聽:「唔怕話俾大家知,我男友屬鼠嘅,所以 technically 佢係忌貓嘅。有一次我整蠱佢,趁佢唔知喺佢架車入面貼滿曬 Hello Kitty 貼紙,仲喺車頭燈痴咗一對超大片嘅假貓貓眼睫毛。不過,真係好嘅唔靈醜嘅靈,佢嗰晚炒車!仲要係成架車返轉咗嗰隻!好彩佢人無事,但係架車就炒到要報銷。」
“West” 口 “West” 面嘅Biiru最適合做邊行?
小花笑到卡卡聲「Biiru 成日面口都好 “west”,好似某大茶餐廳啲侍應一樣咁 “west” 嫁!所以我覺得佢其實好適合做名店入面嘅 sales,可以成日 “west” 口 “west” 面對住啲客好啱佢。」
再問小花,如果 Biiru 係人類,佢要結識另一半,身為媽媽嘅佢希望佢另一半係點嘅樣嫁呢?「喺我角度黎睇,我覺得 Biiru 係一個靚女黎嫁,所以我好希望佢嘅另一半樣貌上都有番咁上下啦!最好唔好整隻好似加菲貓咁樣嘅嚟啦!」
相片: ig @hanatam