日前，愛領養動物中心到求助個案，一個西貢貨倉搬遷，剩低 2 隻嚴重發臭，皮膚有問題嘅倉狗，其中一隻更患有心絲蟲。佢哋係小型混種犬，大約 2-3 歲，一男一女，係兩兄妹。
義工歎道：「其實兩隻狗狗好可愛，腳短短、肉騰騰，理應得到人類嘅愛護…」
中心接收咗兩隻狗狗之後，因為佢哋發出嚴重惡臭，所以喺趕去診所驗血及 body check 之前，兩位非常有愛心嘅寵物美容義工立即趕到領養中心幫忙為佢哋沖涼、洗耳、恤髮，兩個短腳小朋友搖身一變，化身成兩罐「會行走嘅可愛午餐肉」。
現兩隻狗狗暫以兩款午餐肉品牌名命名 – 梅林（妹妹）及長城（哥哥）。經驗血後，妹妹梅林確診患有心絲蟲，現正進行治療，哥哥長城驗血報告顯示患有皮膚病，九月頭已進行絕育。
想支持梅林同長城嘅醫藥費及生活開支，可以登入 www.laas.org.hk 了解更多捐助詳情。
資料及相片來源：@laas.hkg
