眼前呢隻無咗耳仔嘅貓咪叫薯仔。薯仔並唔係天生就無耳仔㗎！佢後天患上耵聹腺瘤，耳道被堵塞；獸醫為免薯仔嘅瘤日後再復發，就直接摘除咗佢嘅耳道同耳殼。
講講薯仔嘅故事畀大家聽下吖！大概 2 年前，Carl 收編咗一隻叫 Horlick 嘅浪貓。佢準備幫 Horlick 揾一個夥伴，於是聯絡當初收容 Horlick 嘅慈善組織，喺組織度見到薯仔。
薯仔同 Horlick 同樣係被呢間慈善組織救助嘅貓咪，但係薯仔外表本身生得有啲惡嘅關係，一直無人問津。因為薯仔曾經同 Horlick 一起流浪過，所以 Carl 決定將薯仔帶返屋企，畀呢兩個老朋友團聚。
Carl 認養之前，薯仔嘅耳仔仲健在㗎，但係及後佢嘅耵聹腺瘤復發，情況仲越來越壞，Carl 就聽取獸醫嘅意見，決定幫薯仔摘除耳道及耳殼。薯仔恢復健康後，Carl 正式領養咗佢。因為耳孔縫合，薯仔嘅聽力稍微差，但喺主人嘅照顧下，佢已經恢復番活力喇，平時嘅生活並無大障礙，亦聽得到主人叫佢個名。
Horlick 非常喜歡自己嘅新夥伴薯仔，佢似乎知道薯仔身體唔好，成日都會好關顧佢。有時薯仔唔小心壓到佢、霸佔咗佢個貓窩，佢都唔發脾氣。
網友們都覺得無耳仔嘅薯仔反而更加可愛，話佢直情係真實版嘅哆啦A夢添！大家又覺得佢似唔似呢？雖然薯仔無咗對耳仔，但佢有個溫暖嘅家，有愛錫佢嘅主人同夥伴，仲有個逾萬 followers 嘅 ig 帳戶添，比起好多未有人領養嘅貓咪幸福好多！
相片來源：@no_ear_meow_potato
