國內陜西兩位年僅 20 歲嘅女生 Lee 同 Lancy 因為太鍾意飲奶茶,而每次飲奶茶嘅時候,愛貓有得睇無得飲,擺出一副可憐樣,於是萌生研發「寵物奶茶」嘅念頭,並創立品牌「TAFFEE 太妃」。品牌首先推出咗「汪茶」(Wo Cha) 及「喵茶」(Mio Cha),之後仲推出咗包括北京填鴨、三文魚同牛扒等多種口味嘅特色寵物奶茶。
Lee 同 Lancy 喺 18 歲時遠赴澳洲留學,受國外善待寵物風氣嘅影響,希望創製出既可以補充營養,又能夠畀寵物飲得安心嘅奶茶,歷經半年研發時間,終於喺月前推出供貓狗飲用嘅奶茶。
「汪茶」主要成分係羊奶粉同雞胸肉;「喵茶」成分取自鱈魚同三文魚;兩款「奶茶」其實主要係用新鮮肉品調製而成,雖然包裝成「奶茶」咁嘅樣,但實質只係「肉汁」嚟。「奶茶」全部不含糖同調味料,唔會造成貓狗腎臟嘅負擔,除咗可以為寵物補水及提供營養之外,仲能夠提升佢哋嘅食慾。
Lee 同 Lancy 表示,佢嘅客戶群主要係 18 至 30 歲嘅年輕一族,七成係女性,品牌第一年嘅營收就已經達約 200 萬人民幣 (約港幣 230 萬) ,所以佢哋睇好未來嘅中國寵物市場,仲計劃推出更多款式嘅寵物飲品,預估下年度業績將突破千萬。
資料及相片來源:sohu;weibo @TAFFEE太妃