呢隻名為 Maya 嘅貓咪天生患有染色體異常症，以致眼睛不對稱，及擁有長短腿問題。路人係喺一家中國餐館後巷嘅垃圾筒旁邊發現 Maya 嘅。佢被帶到一個動物收容所，因為樣貌怪異嘅關係，所以等咗好一陣子都無人收養佢。
當佢被列入被安樂死名單之後，幸得愛護動物組織 Odd Cat Sanctuary MA (@TheOddCatSanctuary) 及時發現，並隨即為佢搵寄養家庭收留佢。組織一直為 Maya 喺網站發佈可愛嘅日常生活照，希望佢可以盡快等到有心人。皇天不負有心人，Maya 終於等到 Beader 同 Makofsky 嘅出現！「我哋喺網站上見到 Maya 嘅生活照，立即對佢一見鍾情，決定領養 Maya。」
Beader 同 Makofsky 領養咗 Maya 之後，原本只係單純想利用社交平台去紀錄同 Maya 嘅日常生活點滴。佢哋萬萬估唔到 Maya 會引起全球愛貓人士嘅關注。「一日，我哋去咗行山，返到屋企竟然發現 Maya 嘅粉絲喺一日之間已暴升至 3 萬，鼓勵嘅留言亦有數千個！」
及後，Beader 受 Maya 所啟發，為 Maya 創立非牟利組織 AllWorthy (@allworthyorg) ，出版咗一本兒童讀物 “Meet Maya Cat: A story about acceptance”。佢哋希望藉住一本易於閱讀嘅書籍令小朋友了解 – 不論人或動物，即使外貌有所不同，但亦應該同其他人及動物一樣，值得被接納及受到尊重。除咗呢本書，AllWorthy 仲推出其他印有 Maya 頭像嘅產品，產品75% 嘅收益就捐贈畀唔同嘅非牟利慈善組織。
現時 Maya 嘅 IG 追蹤人數已達 48.9 萬喇！由一隻被遺棄後巷、即將被安樂死嘅貓咪到成為 IG 人氣網紅貓，Maya 嘅故事真係非常「正能量」呀！小編好想藉呢個 post 感謝對 Maya不離不棄嘅愛護動物組織 Odd Cat Sanctuary MA 及充滿善心嘅收養者 Beader 同 Makofsky。係你哋令大家再次相信，喺充滿罪與惡嘅世界，仍然存在住真善美！
相片來源：FB @meetmayacat ; IG @meetmayacat
