日前，居住喺花都區獅嶺鎮嘅狗主劉先生返到屋企發現，綁喺門口嘅狗狗唔見咗。起初佢以為係繩太鬆，狗狗可能跑咗出去附近玩，喺村入面搵咗好耐都搵唔到佢。再翻查 CCTV，發現狗狗被一名陌生男子抱走，劉先生隨即去派出所報案。
派出所接到事主求助後，立即指派民警喺附近逐家逐戶進行搜索。根據走訪調查，民警好快發現住喺附近嘅周姓男子（37 歲，湖南人）有極大作案嫌疑。
民警同事主劉先生到達疑犯住處外，事主企圖大聲呼喊狗狗個名，屋内隨即傳出狗吠聲，劉先生確認愛犬就喺疑犯屋入面。嫌疑人剛巧踏入家門，民警迅速將佢拘捕。從報案到破案，僅僅用咗 3 個鐘，事主對民警表示感激。
民警喺現場發現，除事主劉先生嘅愛犬之外，仲有幾隻狗狗被困喺籠内，當問及疑犯關於狗狗嘅來源時，佢支吾以對。經調查，狗狗全部都係佢路過人哋屋企時偷返嚟嘅，佢目的係將偷返嚟嘅狗賣畀狗肉販而牟利。目前，疑犯已被花都警方依法刑事拘留，案件正進一步審查當中。
資料來源：YCWB
