一諗起「紋身」兩個字，大家可能立即會聯想到好陽剛嘅「左青龍，右白虎 」。思想較傳統保守嘅媽媽輩又會覺得好人好者唔會走去紋身，紋身嘅人唔會揾到寫字樓工諸如此類。然而，近年韓國掀起一鼓小清新紋身熱，吸引唔少韓星、年輕女性、OL 同文青一族紋身。小清新紋身線條幼細、圖案小巧、低調而精緻，多為動物及卡通嘅小可愛圖像，特別受女士喜愛。
今日，Smart Pet Pet 有幸喺香港揾到專業小清新紋身師葆琳同我地分享佢做動物紋身嘅點點滴滴。今年 24 歲嘅葆琳，外貌甜美可人，擁有三年半紋身經驗，主打動物及卡通小可愛紋身。訪問當日，葆琳位於觀塘嘅工作室 Hello Tattoo 都有幾位上黎做動物紋身嘅女性客人，我地仲即場揾左其中一位年約 50 嘅女客人，問下佢點解會上黎做動物紋身。
Smart Pet Pet x 葆琳客人訪問
SPP: Smart Pet Pet
C: 葆琳客人
圖：客人喺手上紋上已逝世嘅狗狗作永生嘅紀念，希望時刻都可以見到佢。
SPP: 點解妳會上黎做動物紋身？
C: 我隻狗狗前排走左，佢年紀都老喇 16 歲喇，佢腦退化呀…我親手將佢火化嘅，心情到呢一刻都未完全平復到。有朋友講我知呢度有得做動物紋身，我不加思索立即想做。將佢刻喺我手度留個紀念，對我黎講真係好有意義。
SPP: 做動物紋身，家人有無反對？
C: 無反對呀，我啲女呀女婿都無反對，你見我老公都陪我上黎睇住我做。我地都好愛錫佢嫁，養左佢之後，因為都想花多啲時間照顧佢，我地有左佢之後都無去過一次旅行，始終俾朋友或者狗酒店照顧我地都唔放心。
訪問期間，客人一講起自己已逝世嘅寵物一度咽哽落淚，可見佢情緒依然未平復。但係，當佢見到葆琳刻劃喺佢手上腕嘅完成品之後，佢立即重現笑容，大讚：「真係畫得好似佢呀！」小編覺得，某程度上，寵物紋身師其實感覺有啲似心理治療師，佢地令寵物主人得到心靈上嘅安慰，從而可以令佢地有力量繼續重拾正常生活。所以自呢次訪問之後，小編對寵物紋身師呢個行業不能不投以多一份尊敬！
Smart Pet Pet x 紋身師葆琳快問快答
SPP: Smart Pet Pet
PL: 葆琳
SPP: 妳成為紋身師嘅入行經過係點嫁？
PL: 18 歲嗰陣我喺紐西蘭讀緊書嘅，紐西蘭當地有好元化嘅紋身文化，之後我就有興趣想試下啦，但係佢哋嗰度啲紋身風格比較強硬、多粗線條，覺得同自己想做嘅風格唔太適合，所以我就決定唔喺紐西蘭讀書，唔要個學位，跟住返左黎香港做紋身喇。
圖：葆琳嘅小清新系動物紋身作品。
SPP: 點解妳會想專注做動物紋身呢？
PL: 我自本身好鍾意動物；我自己又有養寵物，係 poodle 黎嘅。
SPP: 有咩啟發妳行小清新風格呢？
PL: 初時我做開 New School 風格嘅紋身嘅，New School 畫風係比較粗線條啲嘅，色彩豐富啲，多數係卡通紋身。有次，有個朋友話想整個動物紋身，但係想畫幼線條嘅，我就幫佢試下畫啦。整完之後，我自己都好滿意，然後就愛上咗呢種小清新風格嘅動物紋身喇。
SPP: 做動物紋身嘅難度喺邊度呢？
PL: 難度在於要畫得神似，動物嘅毛髮同眼神要捕捉得好好，如果唔係點畫都唔會似。尤其眼神，對主人嚟講都係獨一無二嘅。
SPP: 揾妳做小清新系紋身嘅多數啲咩類型嘅客人呢？
PL: 大多數係女仔，不過唔止係後生女，上左年紀嘅女士都有嫁。另外，其實男仔都有嫁，所以咩性別同任何年齡層都有。有試過兩公婆上黎一齊紋自己隻狗狗嘅都有。
SPP: 妳喺咩時間幫客人紋身會最有 mood、最專注？
PL: 我喺宿醉時幫客人紋身反而最有 mood、最專注。
SPP: 有無一啲令你印象深刻做動物紋身嘅客人可以同我地分享一下？
PL: 好多揾我嘅客人都係因為寵物離世而整動物紋身嘅，每個客都會同我分享佢同佢寵物之間嘅故事，好多都好感動。試過有個客隻狗狗走咗，過左黎揾我紋身，過左一個月之後，佢去領養中心見到隻同佢走左嘅狗狗一樣嘅狗 BB，連性格都一模一樣，之後佢同我分享番。
圖：葆琳自己身上嘅紋身圖䅁。
SPP: 妳自己身上有啲咩圖䅁嘅紋身呢？
PL: 我自己其實都好怕痛嫁！不過，我自己嘅手臂同手腕都有紋身嘅，主要係一啲得意嘅公仔同卡通圖䅁。
圖：小店都好貼心喺單張度講俾客人知紋身體邊啲部位係痛啲嫁！
SPP: 紋身紋邊啲部位係最痛嫁呢？
PL: 肋骨位會痛啲，其次係手指位同雞心位，總知所有骨位都會比較痛嘅。
SPP: 紋身前有啲咩需要特別準備嫁呢？
PL: 我會建議皮膚比較乾嘅客人紋之前一個月要勤力補濕，因為如果皮膚有好厚角質層就好難入到色落皮膚度。
紋身收費標準
價錢依複雜種程度而定，評估圖案、用色、大小、位置、風格和膚色。
收費由 HK$1,500 起。
八達通 size：HK$1,500 – HK$3,000
CD size：HK$3,000 – HK$6,000
A4 紙 size：HK$6,000 以上
特別鳴謝：Hello Tattoo ig @Hello.Tattoo ; Polam ig @Polamtattoo
