英國寵物食品公司 tails.com 喺聖誕節來臨之前,專誠揾咗外國研究團隊利用科學方法,製作出全世界第一首專為汪星人而設嘅「狗狗聖誕歌」,希望狗狗喺聖誕節聽到聖誕都可以同人一樣,擁有幸福愉悅嘅感覺。目前呢首「狗狗聖誕歌」已經喺 YouTube 發佈,同時亦可以喺 Spotify 同 Amazon Music 上面收聽。
綜合外媒報導,經多位生物學家、獸醫及動物行為學家共同研究之後,tails.com 邀請音樂製作人以 25 隻狗狗進行實驗,透過逾 500 種聲音測試,最終創作出呢首以特殊音效組成嘅「狗狗聖誕歌」-〈Raise the woof!〉。實驗證明,狗狗聽咗呢首歌之後,體內血清素濃度上升,而血清素就係一種被證實能夠為哺乳類動物帶嚟幸福快樂感覺嘅化學物質嚟㗎喇。
動物行為學家 Carolyn Menteith 表示,接受聲音測試嘅狗隻聽到呢首歌之後,反應變得機敏,並嘗試尋找聲音來源;狗狗更多咗抬起頭、擺動耳朵同不停擺尾嘅動作。種種興奮跡象反映,狗狗對首歌 (或歌曲中嘅特殊音效) 有好感,甚至直情係鍾意聽。
〈Raise the woof!〉除咗可以免費喺 Youtube 聽之外,黑膠愛好者仲可以買到佢張實體黑膠唱片 (10 英鎊;約HK$104.4) 添,所有收益將會用嚟支持動物福利機構。立即購買:https://tails.com/gb/raisethewoof
資料來源:tails.com UK