日前，俄羅斯廢物分類工廠一名工人將一隻小貓及時從垃圾輸送帶中拯救出來。
於俄羅斯莫斯科東南約 700 公里嘅城市烏里揚諾夫斯克 (Ulyanovsk) 嘅廢物分類工廠中嘅 CCTV 錄像顯示，廢物分類工人 Mikhail Tukash 從傳送帶上執起一個白色塑料袋，打開袋後居然發現一隻黑白色嘅小貓。
廢物分類工人 Mikhail 對當地小報 Moskovsky Komsomolets 表示：「執起袋時，我感覺到入面有輕微嘅抖動，所以我將袋子打開，見到一隻小貓用可憐嘅眼神望住我。回想當時，如果我一下唔留神嘅話，小貓就已經被廢物分類機器壓碎…」
Mikhail 及同事發現小貓之後立即通知政府有關部門。小貓經獸醫檢查後，幸好健康狀況良好，只係有少少受驚。小貓喺診所休養咗幾日之後已經被烏里揚諾夫斯克州環境部收養，並被非正式地任命為「環境部副部長」。
烏里揚諾夫斯克州衛生部近日喺社交平台發佈咗一張小貓嘅近照 – 貓貓喺環境部長 Gulnara Rakhmatulina 辦公室嘅梳化上好舒服咁午睡，似乎佢已經熟習咗新環境喇！
衛生部仲宣佈會喺州內舉行一個幫「環境部副部長」命名嘅比賽，希望市民踴躍為貓貓改個好名之餘，亦想藉此宣揚愛護動物嘅訊息。Gulnara 喺貼文內補充：「我想呼籲寵物主人，大家應該對動物負責任。如果你無能力飼養寵物嘅話，最低限度可以將佢交到動物庇護所，而並非將佢當垃圾咁棄置。」
資料來源：Reuters
