日本一名潛水伯伯喺 25 年前偶然救咗一條垂死嘅突額隆頭魚，自此大魚同伯伯就成為咗一期一會嘅好朋友。
每年潛水季節，當大魚同伯伯喺水底相遇，大魚都會認得出呢位老朋友，並靠近伯伯畀佢親吻額頭。
八旬嘅伯伯荒川弘之（Hiroyuki Arakawa）熱愛海洋，61 年來都以潛水為樂，而荒川亦職責看管千葉縣館山市海灣下、水深 18 米嘅「洲崎神社」分社。
25 年前，佢喺水底修葺紀念碑時遇到呢條金黃突額隆頭魚，大魚當時睇黎好虛弱。荒川懷疑佢無法自行捕食，於是就連續 10 日親自落水餵佢食野，直到佢完全康復為止。
荒川仲幫大魚起名為「賴子」(Yoriko) ，自此之後，荒川同賴子變得非常親密，甚至容許荒川親吻佢嘅額頭。荒川指：「金黃突額隆頭魚天性易受驚，一般佢哋離遠見到潛水客已經會立即游走，但係賴子就容許我游近，甚至親吻佢；我估賴子知道係我救番佢嘅，所以就肯親近我。」
月前，日本媒體《Great Big Story》及《ANAHiroyuki Arakawa》將荒川將與賴子相處嘅紀錄片上載到 YouTube，不足 3 星期已有逾百萬人觀看。網民紛紛留言讚美賴子：「係上帝派黎看守神社嘅使者」、「與別不同，具備其他魚無嘅記憶力同智力」。
資料及相片來源：《Great Big Story》;《ANAHiroyuki Arakawa》
