聖誕節除咗送禮物畀自己嘅毛孩表達你對佢嘅愛之外,有無諗過好多流浪動物都好需要人類嘅愛同溫暖㗎?有見及此,寵物生活用品店 Whiskers N Paws (WNP) 每年聖誕節都會舉行一個名為 “Santa Paws” 嘅毛孩送暖行動,目的係希望流浪動物都可以喺佳節感受到人間溫暖。
香港人出名有愛,活動推出咁多年,反應一向熱烈。雖然今年各行各業都深受疫情影響,但相信唔會因為咁,而阻止到一眾熱心嘅香港人送暖嘅。
“Santa Paws” 活動主要目的係將所收集返嚟嘅全新或者二手寵物用品,捐贈畀 12 間本地救助流浪動物組織及動物福利機構。想參與「毛孩聖誕送暖行動」嘅你,如果你有未開封嘅貓狗糧、未開封嘅貓狗零食、狗隻頸圈及拖帶、全新或二手寵物玩具、全新或二手毛巾、二手床上用品及寵物袋,就可以由即日起至 31 日,將物資捐贈至全港設立嘅收集點。
放心!收集點有成超過 40 個咁多㗎,梗有一個喺你左近㗎!
咁有意義嘅活動,你又點可以唔參與呀?
收集點名單及更多活動詳情:www.wnp.com.hk/blogs/events/operation-santa-paws-2020
資料及相片來源:Whiskers N Paws