而家唔少家庭都可能計劃緊帶埋寵物移民外地，為咗處理繁複嘅手續，好多人都會考慮委託寵物移民公司代辦寵物移民事宜。早前消費者委員會以一般消費者身分向 11 間寵物移民公司索取咗代辦貓同狗移居至澳洲、加拿大、英國、美國及台灣嘅報價資料，發現呢啲移民公司嘅報價普遍過於籠統，有公司嘅最終總支出更較公司原先基本報價多接近兩倍！
報價未包 3 項較大筆嘅開支
喺調查嘅 11 間移民公司中，發現 9 間提供代辦犬隻移居至澳洲嘅基本報價同實際總開支差距可以有成 15% 至 190% 不等。主要原因係公司提供嘅基本報價，未必包括寵物運費、隔離費及入口許可證費用等呢 3 項較大筆嘅開支。例如有 8 間未有將澳洲嘅入口許可證，又或台灣及英國清關費用列入報價中，須由顧客自付；有 10 間移民公司亦表明可協助預約隔離設施，但兩地或其中一地嘅隔離費用都係要顧客自付。
兩種空運方式可相差 120%！
另外，調查亦指出，移民公司一般都會安排貓狗以空運方式離港，主要分寄艙及貨運兩種，消費者要留意返原來兩者收費差異都幾大！例如代辦柴犬移居至美國，若主人同柴犬乘搭同一航班並以寄艙形式託運，其中 1 間移民公司連運費嘅報價金額為 $25,000；若以貨運形式單獨託運柴犬至美國，連運費嘅報價金額則為 $55,000，相差成 120%！而且大部分公司都冇喺報價時一併提供服務及收費條款，當移民計劃有咩變動，可唔可以改、手續費係幾多等等，大家都記得要問清楚！
就住寵物移民同委託公司代辦手續，消委會提醒大家應注意以下 6 點：
- 寵物主人應清楚了解移居地對寵物入口嘅要求及流程，萬一遇上服務不佳嘅公司，亦能盡量將損失減至最低。
- 務必要貨比三家，用總支出預算嚟比較，亦要多了解唔同公司嘅口碑同信譽。
- 一定要有詳細報價單，宜向航空公司及寵物移民公司查詢唔同運送方法嘅預算
- 要求移民公司訂明付款方式及服務條款，特別係改期出發、取消服務及服務未能完成嘅條款，若日後出現爭拗亦有所憑據。
- 預留充足時間為寵物辦理移民手續：移居至加拿大、英國及美國一般需預留 1 至 3 個月準備；而澳洲及台灣則需要提前 6 至 9 個月準備。
- 應提前為寵物身心做好準備，以減低託運時對佢哋嘅影響。
