台灣一向被譽為全亞州最 pet friendly 嘅城市，全市狗公園共 1,692 個，夠大、草地又靚，而且為狗狗而設嘅設施配套仲好完善添！就以台北同香港最細嘅狗公園作比較 (台北玉成狗公園面積約 3,348 呎；大坑徑休憩處面積約 1,033 呎)，只係計面積都大成 3 倍！
而設施配套方面，台北玉成公園係全草地公園，設安全圍欄及雙出入口加強安全防護，園內亦設有多張供狗主休憩用座椅、充足嘅狗便袋箱及垃圾桶等，放狗嘅基本需要全部有齊。
動保處亦會每日定時派員進行垃圾清潔及設施巡查，仲會使用對狗狗較無害嘅防疫用消毒水每星期為設施噴灑消毒。
此外，為咗提供更加全面嘅友善寵物措施，台北市公共運輸處更配合玉成公園狗活動區啟用，新增週末及假日「台北市友善狗狗公車」，畀狗主可免提籠，只需繫上狗繩就可以搭乘公車直達公園，非常人性化。公園外圍不遠處亦有個大型停車場，方便揸車嘅狗主。
反觀香港，大坑徑休憩處狗公園除咗細 (面積大約得 1/4 個藍球場咁上下) 同全石地之外，街坊亦經常投訴公園多蚊及經常傳陣陣垃圾臭味。公園內基本設施就只有幾張長椅同一個狗便沙池，而且設施污糟殘舊，垃圾筒亦經常爆滿都無人清，明顯公園無乜人打理。
另外，公園位處於馬路旁邊，唔少附近住宅嘅車主會將車泊喺公園出面，所以喺公園入面會不時聞到車輛排出嚟嘅廢氣。公園位置方面，地點唔算就腳，除咗搭的士可以直達之外，住喺天后區嘅狗主只能夠步行，仲要行一大段斜路先可以去到，未放狗都已經身水身汗，就算住附近嘅街坊都寧願揸車去遠少少嘅北角或跑馬地狗公園放狗。
相片來源：tcapo、cdns、petpark、lscd
