新年唔少狗狗主人放縱暴食嘅同時,見到狗狗流晒口水個萌樣,又唔忍心唔畀佢食,所以自己食一啖,又餵狗狗食一啖咁。但係你知唔知道,其實唔少賀年食品都唔太適合狗狗食㗎,食咗小則肚瀉,大則中毒身亡㗎!因此,各位狗主新年要小心,千祈唔好亂咁餵佢食賀年食品諗住同佢分甘同味,又或者覺得餵食少少無傷大雅呀,咁樣分分鐘「愛佢變成害佢」㗎!
1 年糕、蘿蔔糕
解說:用糯米做嘅年糕容易引致狗狗腸胃不適;而人類食嘅蘿蔔糕對狗狗嚟講亦太油膩喇,不宜餵狗狗進食。
危險指數 (5 * 滿分):***
2 魷魚絲、肉乾
解說:人類食嘅魷魚絲及肉乾較高鹽,調味料又多,狗狗食咗好可能會肚瀉,嚴重起上嚟更會有損腎功能。
危險指數 (5 * 滿分):***
3 麻糬、酥餅炸物
解說:狗狗消化系統同人類唔同,食「高糖、高油、高脂」嘅食物,好容易會消化不良同肚瀉㗎。
危險指數 (5 * 滿分):***
4 瓜子、果仁、花生、核桃
解說:堅果容易令狗狗消化不良,而夏威夷果仁 (macadamia nuts) 仲會令狗狗食咗有機會中毒添㗎,千祈唔好畀佢食呀。
危險指數 (5 * 滿分):****
5 果乾、蜜餞
解說:蜜餞糖分超高,絕對唔適宜狗狗食用;而另外特別要注意嘅係提子乾,狗狗食咗有機會中毒㗎,千祈唔好畀佢食。
危險指數 (5 * 滿分):*****
6 糖果、朱古力
解說:糖果除咗高糖分之外,加入木糖醇甜味劑(xylitol)嘅糖果仲有可能令狗狗肝臟衰竭添㗎;而朱古力絕對唔應該畀狗狗食,食咗會中毒,呢個應該係養狗人士必知嘅基本常識啦!
危險指數 (5 * 滿分):*****