好多人誤會人狗瑜伽係要寵物做高難度動作，例如倒立、單腳企等，但事實並非如此，Doga 主要係由主人進行瑜伽，而狗狗只係擔任輔助角色，同主人互動。因此，佢嘅好處除咗對主人嘅身心健康有益之外，當主人心情平靜，狗狗都會感受得到，令雙方嘅心情同樣變好，有助增進主人同寵物之間嘅感情。
今日，人狗瑜伽導師 Tina 將會為大家示範簡單易學嘅 Doga 式子，你都不妨同毛孩一齊學喺屋企學吓吖！
溫馨提示：
注意狗狗嘅情緒，假若你感覺佢有啲驚，或者有啲抗拒，就唔好勉強。
主人可以先幫狗狗按摩四肢關節，作為瑜伽前嘅熱身。
主人抱起狗狗或者幫佢哋做伸展動作時，尤其要小心佢哋嘅脊柱及四肢，必須確保支撐好狗狗嘅肢體，以免傷及筋骨。
身體狀況欠佳嘅狗狗不適宜進行瑜伽，主人需先自行判斷及衡量狀況。
